COMMISSION ON YOUTH - ARCHDIOCESE OF CEBU

 “Pondo sa mga Batan-on” alang sa WYD 2008

“Kandila, mineral water, ice water…” mao kini ang gisinggit sa atong mga COY volunteers didto gawas sa minteryo, niadtong Nobiyembre dos ug uno. Matud pa ni Abdul, “…kandila kamo – alang sa mga dalaga, libre… apan alang sa mga minyo, doble!” Palit na intawon kamo kay ang ginansya niini among ibutang sa “pundo sa mga batan-on” aron makaapil kami sa pagsaulog sa World Youth Day (WYD) sa Sydney, Australia (July 15-20, 2008).
Uwan ug init, waa namo panumbalinga kay ang tanan nagtinguha nga makatampo alang sa among pundo. Bisan og daghan ang kompetensya sa karsada, pabaga lang gyud sa nawong aron mahalin og dali ang mga tinda. Kay ang uban ra ba niini ‘good as sold’ ug ang kasagaran ‘consignment.’ Busa, kandila kamo, kandila… dila… dila… ilong, dunggan, mata ug uban pa! Tooooink!

Way pahulay ang mga COY volunteers sa pagpamaligya bisan kon ngi-ob na. Pila ra may pagdagkot as gitinda namong kandila. Oooopps… di diay pweding dagkotan, kay igbabaligya man kini aron kami makaganansya. Bisan kon morag multo nag mga nawong, tungod sa kakapoy, syagit lang gihapon og “kandilang dili kono maupos,” di gyod tinuod maupos, basta dili lang sab dagkotan nga ihalad sa mga kalag nga kabus. Ngeeehhh!

Kon mohinay na gani ang mamalit sa kandila ug tubig, silang Joseph, Jeruss, Ginapie, Tere ug Krishna magdali-dali dayog pamunit og mga lata, plastic sa mineral water, botelya ug karton. Nakahipos intawon sila og mga upat ka sako aron ipatimbang sa sunod semana. Hinaut nga motaas na ang palit sa matag kilo sa ‘scraps’ nga ipatimbang ni Joseph… bisan kon ang presyo sa dolyar nius-os na. Unsa may kalabutan sa plastik ug sa dolyar? Ang halin sa plastic among ipalit og dolyar nga maoy ibayad sa WYD registration fee.
Dili kami mga ambisyoso ug ambisyosa. Usa kini ka damgo nga kutob sa among mahimo among paningkamotan sa pagkab-ot, basin nalang kon sa among paningkamot, kaming tanan sa WYD 2008 makasalmot. Ingon man gud niini ang pamaagi sa mga batan-on sa Europa ug Amerika. Fundraising sama sa Food Fair, Carwashing ug uban pa, kining tanan ilang gipahigayon aron makapundo og kwarta aron makaapil sa World Youth Day.

Binasehan sa akong eksperyensya didto sa Roma sa 2000, Canada sa 2002 ug sa Germany 2005, ang makakuyog kadto ra gyong mga batan-on nga adunay ‘kaya.’ Ug kasagaran gani, dili na gayod tinoud nga mga ‘youth’ kondili mga yut-yot nga gyod intawon. Ang nakapait pa gyod kay kasagaran kanila dili mga aktibo sa kalihokan sa mga batan-on diha sa matag parokya. Kay ang mga aktibong batan-on sa parokya waa may ‘kaya.’ Load pa gani, inutang pa!

Busa hagit kini sa atong mga COY volunteers, uban ang paglaum nga makaabot ang among “pundo sa mga batan-on” alang sa mga galastoan sa biyahe. Kon duna kamoy newspaper, karton, botelya, lata ug uban pa nga among ikabaligya, tawag lang kamo sa atong opisina (253-0173 ug 254-6065) kay among kuhaon gikan sa inyoha. Dako na kayo kanag ikatabang sa among “fundraising” karon nga gimugna.

Sunod semana aduna kami ipahigayon nga “Rummage Sale” diri sa tugkaran sa National Shrine ni San Jose, dakbayan sa Mandaue. Bisita usab kamo, basin og duna kamoy mapalit ug ikatabang sa atong mga batan-on. Isunod usab namo ang “Food Fair” unya. Sa laing bahin, giandam na usab ang usa ka proyekto kabahin sa pagpanahi og mga trapo, aron madugangan ang among pundo. Naghangyo ako sa inyong pagsuporta. Salamat daan!
Iampo sab intawon ninyo kami kay dili lang baya ‘fundraising’ ang among giatiman kondili kining mga COY volunteers matinud-anon kaayong moapil matag semana sa mga youth ongoing formation, ilabi na sa pagpalambo sa espirituhanong kinabuhi. Agi kinig pagpangandam, kay kining WYD2008, dili man usa ka ‘tour’ kondili usa kini ka ‘pilgrimage’ sa mga batan-on sa Simbahan.

YouthLinks... Youth Power sa Simbahan

        Naglaray na sa kilid ang mga batan - on sa pagpa - abot sa atong YouthLinks Center. Nanglingkod kay naghulat nga tawgon ang ilang pangalan aron interbyohon ni Tere ug Venessa. Sila ang mga aplikante alang sa mga... more